کوئٹہ:کرونا وبا کے مقابلے کے لیے حفاظتی سامان فی الفور فراہم کیا جائے‘ فرائض کی ادائیگی جاری رکھیں گے: ینگ ڈاکٹرز

|رپورٹ: نمائندہ ورکر نامہ|

ینگ ڈاکٹرز ایسوسی ایشن بلوچستان کے ترجمان کے جاری کردہ ایک بیان میں کہا گیا ہے کہ تاحال صوبے کے ٹرشری کیئر ہسپتالوں میں پرسنل پروٹیکٹیو ایکویپمنٹس (PPEs) کی عدم فراہمی انتہائی قابل تشویش ہے۔ ڈیوٹی پر مامور ڈاکٹرز، نرسز اور پیرامیڈیکل اسٹاف اپنی مدد آپ کے تحت اور بنا حفاظتی کٹس(PPEs) کے ڈیوٹیز سرانجام دے رہے ہیں۔

ترجمان نے واضح کیا کہ سنڈیمن پراونشل ہسپتال اور بولان میڈیکل کمپلیکس ہسپتال میں قریباً 3 ہزار تک ڈاکٹرز، نرسز اور پیرامیڈیکل اسٹاف تعینات ہیں۔ ڈی-جی ہیلتھ سروسز میں سٹاک کرنے کے بجائے ان تمام ڈاکٹرز،نرسز اور پیرامیڈیکل اسٹاف کو اگلے 30 دن تک کیلئے ایمرجنسی بنیادوں پر PPE کٹس، ڈیسپوزیبل آئیٹمز اور ہینڈ سینیٹائزرز فراہم کئے جائیں۔ ترجمان نے مزید کہا کہ موجودہ ایمرجنسی صورتحال میں مکمل یکسوئی سے اپنی خدمات سرانجام دے رہے ہیں اور آگے بھی اپنی خدمات دیتے رہیں گے۔

ترجمان نے عوام سے پرزور اپیل کرتے ہوئے کہا کہ موجودہ ایمرجنسی صورتحال میں بلا وجہ بازاروں اور ہسپتالوں کا رخ کرنے سے پرہیز کریں۔ صوبے کے ڈاکٹرز،نرسز اور پیرامیڈیکل اسٹاف کسی بھی ہنگامی صورتحال سے نمٹنے کیلئے ہمہ وقت تیار ہیں۔

Comments are closed.