انڈیا: عام آدمی پارٹی کی عوام دشمن حقیقت

بد عنوانی اور سرمایہ داری

عالمی منڈی پر غالب سامراجی ممالک نے اپنی لوٹ مار کی غرض سے ترقی پذیر ممالک کہلانے والے خطوں میں سرمایہ داری نظام کی جس ناہموار اور بے ہنگم طرز کو اوپر سے جبراً مسلط کیا اس نے ان سماجوں کے ارتقا کو ایک مخصوص بگڑی ہوئی ساخت عطا کی۔ اس مخصوس طرز ارتقا کے عمومی قانون کی خصوصیات اور اس سے جنم لینے والے تضادات کے نتائج کی سائنسی وضاحت لیون ٹراٹسکی نے مشترکہ اور نا ہموار ترقی کے تاریخی قانون کے وسیع اطلاق کے ذریعے اپنی بے شمار تصانیف اور بالخصوص اپنے شاہکار نظریہ مسلسل انقلاب میں کی تھی۔ اس وضاحت کے مطابق پسماندہ ممالک تاریخ کے جس موڑ پر سرمایہ دارانہ عالمی منڈی کے دھارے میں داخل ہوئے اس وقت ترقی یافتہ ممالک کی بورژوازی تکنیکی ترقی اور مالیاتی طاقت کے حوالے سے پہلے ہی عالمی منڈی پر سامراجی غلبہ قائم کر چکی تھی۔ یوں پسماندہ ممالک کی بورژوازی اپنے جنم سے ہی تکنیکی اور مالیاتی حوالے سے عالمی منڈی پر غالب سامراجی ممالک کی بورژوازی کے مرہون منت، مطیع اور غلام تھی۔ دوسرے لفظوں میں، ترقی یافتہ ممالک میں سرمایہ دارانہ انقلابات پہلے برپا ہوئے جس کی وجہ سے ان ممالک کے سرمایہ داروں کو اپنی صنعت اور تکنیک کو بتدریج ترقی دینے کے لیے دہائیوں اور صدیوں پر مبنی طویل وقت میسر تھا۔ اس عرصے کے دوران ان سرمایہ داروں نے ریاستی طاقت پر اپنے تسلط کو استعمال کرتے ہوئے اپنے سرمائے میں اضافے کے لیے جاگیرداروں اور چرچ کی ملکیت کی کھلی لوٹ کے ساتھ زمینوں سے بے دخل کیے جانے والے غریب کسانوں کو اپنی فیکٹریوں میں ہانک کر ان کے قوت محنت کا بھی بے پناہ استحصال کیا۔ صرف اتنا ہی نہیں بلکہ اس اُبھرتے ہوئے سرمایہ دار طبقے نے دنیا کے سبھی خطوں کو اپنی نو آبادیات میں تبدیل کر کے ان کے قدرتی وسائل اور دولت کو بھی کئی صدیوں تک دونوں ہاتھوں سے لوٹا۔ یوں ترقی یافتہ سرمایہ داروں کے پاس قدر زائد کی وہ بے پناہ مقدار جمع ہوئی جس کے ایک حصے کو تحقیق پر خرچ کرتے ہوئے انہوں نے تکنیک کو بے پناہ ترقی دی۔ اپنی اسی لوٹ مار کو جاری رکھنے کی غرض سے ہی ترقی یافتہ بورژوازی اپنی نو آبادیات میں سرمایہ دارانہ ذرائع پیداوار رائج کرنے اور ان خطوں میں بورژوا ملکیتی رشتوں کو متعارف کرانے پر مجبور ہوئی۔ سامراجی ممالک کے زیر سایہ ان خطوں میں ایک بورژوا طبقے کی نشوونما ہوئی جو ہر حوالے سے ان کا مطیع، گماشتہ اور غلام تھا۔ ترقی یافتہ ممالک کی بورژوازی نے اپنی ریاستوں سمیت پورے کرہ ارض کی دولت کو لوٹ کر اتنا دیو ہیکل سرمایہ حاصل کر لیا تھا کہ انہیں اپنے اپنے ممالک میں پرولتاریہ کی جدوجہدوں کے نتیجے میں ایک ایسا جدید ریاستی ڈھانچہ استوار کرنا پڑا جو نسبتاً کم بد عنوان تھا۔ یعنی ان ممالک کی بورژوازی کو سرمائے کی اس قدر بہتات تھی کہ انہیں کسی گلی کی سڑک یا نالی کی تعمیر کے ٹھیکے سے کمیشن حاصل کرنے کے لیے بد عنوانی کی ضرورت نہیں تھی۔ اسی لیے ان کو سماجی تعمیرات یا دیگر ایسے شعبوں کے سربراہان یا کلرکوں کو بد عنوانی، کمیشن خوری اور رشوت میں ملوث کرنے کی ضرورت پیش نہیں آئی۔ اس کا ہرگز یہ مطلب نہیں کہ ان ممالک کے سرمایہ دار بد عنوانی میں ملوث نہیں ہیں بلکہ اس کے بالکل برعکس ان ممالک کے سرمایہ دار تیسری دنیا کے ممالک سے زیادہ بڑے لٹیرے اور بد عنوان ہیں لیکن وہ اپنی اس لوٹ مار کو ریاستی اور عالمی منڈی کے قوانین کی تشکیل کے ذریعے جائز بنا دیتے ہیں۔ اس سب کے باوجودہمیں وقتاً فوقتاً تمام ترقی یافتہ ممالک میں بھی بد عنوانی کے بڑے بڑے واقعات نظر آتے رہتے ہیں۔ یہ بات کسی حد تک درست ہے کہ ان ممالک میں سماجی خدمات اور دیگر ریاستی اداروں کی صورتحال ایسی نہیں ہے کہ عام لوگوں کو پولیس کے ہر ناکے پر بلاوجہ رشوت دینی پڑے یا شناختی کارڈ بنوانے سے لے کر ہسپتال سے دوائی لینے یا سکول و کالج میں داخلہ لینے یا بجلی کا کنکشن لینے جیسے روزمرہ کاموں کے لیے رشوت یا سفارش کی ضرورت پڑے۔ اس کے برعکس پسماندہ ممالک کی بورژوازی کی صورتحال مختلف تھی۔ نہ تو ان کا جنم آزاد تاریخی ارتقا اور نشوونما کے نتیجے میں ہوا اور نہ ہی ان کو لوٹ مار کے وہ وسیع تر مواقع میسر آئے اور نہ ہی ان کو صنعت و تکنیک کو ترقی دینے کے لیے طویل تاریخی مدت دستیاب تھی۔ ان کا جنم سامراج کی چھتر چھایہ میں ایک گماشتہ طبقے کے طور پر ہوا اور دوسری جانب پسماندہ ممالک میں سرمایہ داری نظام کی استواری پرانے سماجی ڈھانچے کا کسی انقلاب کے ذریعے مکمل طور پر صفایا کرتے ہوئے نہیں ہوئی تھی۔ بلکہ ان ممالک میں جہاں ایک جانب سرمایہ داری کی کچھ بنیادیں سامراجی ممالک کی لوٹ کے پیش نظر انتہائی بے ہنگم انداز میں تعمیر ہوئیں وہیں ان ممالک کے زیادہ تر علاقوں میں صدیوں سے چلے آنے والے پرانے قبائلی، نیم قبائلی اور نیم جاگیرداری تعلقات کی باقیات بھی موجود تھیں۔ یوں جدید صنعت اور دیگر انفراسٹریکچر کی تعمیر نے ایک طاقتور پرولتاریہ بھی پیدا کر دیا جو ان ممالک کی بورژوازی کے برسر اقتدار آنے سے قبل ہی اپنی ہڑتالوں اور جدوجہدوں کے ذریعے اس گماشتہ بورژوازی کے نظام کو اکھاڑ پھینکنے کے ارادے اور صلاحیتوں کا اظہار کر چکا تھا۔ سوویت انقلاب کی فتح نے اس امکانی خطرے کو ایک فوری حقیقی خطرے میں تبدیل کر دیا تھا۔ ہندوستان کی بورژوازی اور اس کے سیاسی نمائندے ہندوستان کی قومی آزادی کی جدوجہد کے دوران ہی اپنے خلاف اُبھرتے ہوئے ایک پرولتاری انقلاب کے خطرے کی جھلک بارہا دیکھ چکے تھے۔ اسی لیے انگریز سامراج کے خلاف آزادی کی لڑائی کی آخری دو دہائیوں کے دوران ہندوستان کی بورژوازی اور اس کے سیاسی نمائندوں نے محنت کشوں کی ہر ہڑتال اور جدوجہد کی نہ صرف بھرپور مخالفت بلکہ ان سے بد ترین غداری کی۔ اس عمل میں ماسکو کی نظریاتی زوال پذیری اور انقلاب سے غداری کے باعث ماسکو کی اندھی تقلید کرنے والی ہندوستان کی سٹالنسٹ پارٹیوں کے جرائم نے بھی ان کی معاونت کی۔ انہی بنیادوں پر دوسری عالمی جنگ کے بعد انگریز سامراج کے خلاف اُبھرنے والی جدوجہد کو مذہبی فرقہ واریت کی زہریلی تلوار سے کاٹ کر ہندوستان کے زندہ جسم کو تقسیم کر کے دو گماشتہ سرمایہ دارانہ ریاستیں تشکیل دی گئیں۔ ان ریاستوں کی بورژوازی اپنی نامیاتی کمزوریوں اور تاریخی خصی پن کے باعث محنت کش طبقے کے خلاف ان سماجوں کی سبھی رجعتی طاقتوں کے ساتھ گٹھ جوڑ کے ذریعے بر سر اقتدار آئی۔ اس غیر فطری اور رجعتی گٹھ جوڑ نے اس گماشتہ بورژوازی کو جدید تاریخ کے سب سے رجعتی طبقے میں تبدیل کر دیا جس میں خود اپنے نظام کے تاریخی فرائض پورے کرنے کی خواہش کا بھی خاتمہ ہو گیا تھا، یہ الگ بات ہے کہ ان فرائض کی تکمیل کی صلاحیت سے یہ پیدائشی طور پر ہی محروم تھے۔ اس گماشتہ بورژوازی کو سامراج کی جانب سے ورثے میں منتقل کیا گیا جو ریاستی ڈھانچہ ملا انہوں نے اسے کانٹ چھانٹ کر کے بہتر بنانے کی بجائے اپنے خصی پن کے رنگ میں اس کو بھی رنگ دیا۔ اپنی تاریخی کمزوریوں اور خصی پن کا ازالہ کرنے کے لیے درکار سرمایہ حاصل کرنے کی غرض سے اس بورژوازی نے اسی ریاستی ڈھانچے کو سر تا پا بدعنوانی کی غلاظت میں غرق کر دیا۔ بورژوازی اپنی مالیاتی اور تکنیکی کمزوریوں کا خاتمہ کرنے کی اہلیت سے عاری ہونے کے باعث ایک جانب سامراجی غلامی کا نیا طوق گلے میں ڈالنے پر مجبور تھی اور دوسری جانب قدر زائد کی لوٹ کے لیے اپنے ہی سماج کے وسائل کو نوچنے کے علاوہ اس کے پاس کوئی ذرائع موجود نہیں تھے۔ یوں بورژوازی کو جس بے دردی کے ساتھ قومی وسائل کو لوٹنے کی ضرورت تھی اس کو پورا کرنے کے لیے اسے پورے ریاستی ڈھانچے کو اس بدعنوانی میں اپنا شراکت دار بنانا پڑا۔ پاکستان میں اس شراکت داری نے فوج کو اس قدر مضبوط بنا دیا کہ اس وقت فوج خود تمام تر کاروبار اور معیشت کے ایک تہائی سے زیادہ حصے کی مالک بن چکی ہے۔ ہندوستان میں اگرچہ آغاز میں نہرووین سوشلزم کے نام پر ریاستی تحفظاتی پالیسی کے ذریعے ایک بورژوا طبقے کی نشوونما کرنے کی پوری کوشش کی گئی لیکن یہ عمل بھی ناکامی سے دوچار ہو گیا۔ یوں دیگر پسماندہ بورژوا ممالک کی طرح ہندوستانی سرمایہ داری میں بھی بدعنوانی نظام کی خرابیوں کی وجہ نہیں بلکہ اس گماشتہ سرمایہ داری کو زندہ رکھنے اور اس کی سانسوں کو بحال رکھنے کا ایک ذریعہ بن چکی ہے۔ جس طرح کسی بچے کی ٹانگیں پیدائشی طور پر مفلوج ہوں اور اس کا علاج ممکن نہ ہو یا بر وقت علاج نہ کرانے کی وجہ سے اس کی معذوری مستقل شکل اختیار کر جائے تو اس کو کھڑا ہونے یا تھوڑا بہت چلنے کے لیے بیساکھیوں کی ضرورت پڑے گی۔ صرف اتنا ہی نہیں بلکہ جوں جوں وہ بڑا ہوتا جائے گا توں توں اسے زیادہ بڑے سائز کی بیساکھیوں کی ضرورت ہو گی۔ اگرچہ اس کے باقی جسم کی نشوونما صحت مند انداز میں ہو رہی ہوتی ہے لیکن اس کا مفلوج پن اپنی جگہ پر موجود رہتا ہے۔ اب اگر تیس سال بعد اس کی بیساکھیوں کو اس کی معذوری کی وجہ قرار دے کر اس سے بیسا کھیاں چھیننے کی کوشش کی جائے گی تو وہ پھر بھی اپنے پاؤں پر کھڑا نہیں ہو پائے گا بلکہ منہ کے بل گر جائے گا۔ اسی طرح پسماندہ ممالک کی گماشتہ سرمایہ داری اپنے جنم کے مفلوج پن کے باعث بدعنوانی کی بیساکھیوں کے سہارے کھڑی ہونے کے قابل ہے اور بد عنوانی کے خاتمے کی ہر سنجیدہ کوشش اس پوری سرمایہ داری کی عمارت کو لرزا دیتی ہے۔ اس لیے ہندوستان سمیت دیگر پسماندہ ممالک میں بھی بد عنوانی کے خلاف اس طرح کی تحریکیں چلتی رہتی ہیں اور بعض اوقات اس بے پناہ حد تک پھیلی ہوئی بدعنوانی کے خلاف نیچے سے محنت کشوں اور عام عوام کی بڑی سنجیدہ تحریک اُبھرنے کے خطرات کو ٹالنے کے پیشگی اقدامات کے طور پر خود حکمران طبقات کے سنجیدہ حصوں کو بھی کچھ انتہائی سخت عملی اقدامات تک کرنے پڑتے ہیں۔ لیکن ان تمام اقدامات اور تحریکوں کا مقصد بد عنوانی کا خاتمہ نہیں ہوتا بلکہ بے قابو ہوتی بدعنوانی کو ایک قاعدے میں لانے کے ساتھ محنت کشوں اور عام عوام کا نظام پر اعتماد بحال کرنا ہوتا ہے۔ پسماندہ ممالک کے تمام تر تجربات کا نتیجہ یہی ہے کہ اس گلی سڑی سرمایہ داری کو قائم رکھتے ہوئے اس کے اندر سے بد عنوانی کا خاتمہ کرنا ممکن نہیں۔ بد عنوانی کے خلاف اُبھرنے والی تحریکوں کے نتیجے میں کچھ نئے قانون بنا دیے جاتے ہیں یا جب تک تحریک کا زیادہ زور ہوتا ہے اس دوران رشوت اور بد عنوانی کے طور طریقے تبدیل کر دیے جاتے ہیں یا زیادہ سے زیادہ چند ہفتوں یا مہینوں کے لیے رشوت لینے اور بد عنوانی سے کسی حد تک اجتناب کیا جاتا ہے لیکن پھر ہر چیز معمول پر آجاتی ہے اور اس دوران بدعنوانی کے نئے طریقے بھی دریافت ہو چکے ہوتے ہیں۔

اقلیت کی حکمرانی اور بد عنوانی

تاریخی حوالے سے بھی جائزہ لیا جائے تو بورژوازی کوئی پہلا بد عنوان حکمران طبقہ نہیں تھا، نہ ہی بد عنوانی بورژوازی کی ایجاد ہے۔ سماج کی طبقات میں تقسیم کے ساتھ ہی بالا دست یا حاکم طبقات میں اپنی حاکمیت اور اختیارات کا لوٹ مار اور عوام کے خلاف ناجائز استعمال کا عمل شروع ہو گیا تھا۔ ہر طبقاتی سماج کا حکمران طبقہ اپنی مخصوص طرز سے بد عنوان تھا اور بد عنوانی ہر اقلیتی حاکمیت کا نامیاتی جزو رہی ہے۔ سلطنت روم کے غلام مالکان یا عہد وسطیٰ کے جاگیردار اور بادشاہتیں آج کی بورژوازی سے کم بد عنوان نہیں تھیں۔ اس لیے بدعنوانی کی وجوہات کو شخصیات یا سماجی پرتوں کی اخلاقی گراوٹ میں نہیں تلاش کیا جا سکتا بلکہ ان ٹھوس مادی و سماجی حالات میں ہی بد عنوانی کی جڑیں پیوست ہوتی ہیں جو کسی خاص تاریخی عہد میں سماج کی ایک چھوٹی سی اقلیت کی حاکمیت کو تاریخی جواز فراہم کرتے ہیں۔ اقلیت کی حاکمیت اور اختیارات کے قیام کا اگر مادی تاریخی جواز موجود ہو تو یہ وجود میں آجاتی ہے اور پھر کوئی آفاقی اخلاقی معیار باقی نہیں رہتا بلکہ اسی حاکمیت کی طرفداری اور ضروریات ہی اخلاقیات کا معیار بن جاتا ہے۔ اختیارات اور حاکمیت کی صدیوں سے چلی آنے والی اپنی ہی ایک منطق ہے۔ لیون ٹراٹسکی نے سوویت انقلاب کی زوال پذیری کو جنم دینے والے ٹھوس سماجی حالات اور بیوروکریسی کے اُبھار کی وجوہات کی وضاحت انتہائی سادہ مثال کے ذریعے کی تھی۔ اس نے لکھا تھا کہ ضروریات زندگی کی اشیا کی قلت بیوروکریٹک کنٹرول کی ضرورت کو جنم دیتی ہے۔ اگر گوشت کی دکان پر گوشت طلب کرنے والوں کی طویل قطار ہوگی تو اس ہجوم کو قاعدے میں رکھنے کے لیے ایک سپاہی درکار ہوگا۔ لیکن یہ سپاہی سب سے پہلے گوشت کا ایک بہترین ٹکڑا اپنے لیے الگ رکھ لے گا۔ اسی عمل کی وضاحت انیسویں صدی کے معروف انگریز تاریخ دان لارڈ اکٹن نے ان الفاظ میں کی تھی کہ ”طاقت بدعنوان کرتی ہے اور مطلق طاقت مطلق طور پر بد عنوان کر دیتی ہے“۔ سوویت بیوروکریسی کی حاکمیت کو جس مادی پسماندگی اور انقلاب کی تنہائی نے جواز فراہم کیا تھا ان حالات میں اس بیوروکریسی کو بد عنوان ہونے سے سوشلزم کے عظیم آدرش بھی نہیں روک پائے۔ حاکمیت سے جڑی بد عنوانی کی غلاظت سے بچنے کا ایک ہی طریقہ ہے کہ اس کے خاتمے کی مسلسل اور انتھک سائنسی جدوجہد جاری رکھی جائے جیسا کہ لیون ٹراٹسکی نے کیا تھا۔ یہی عمل بعدازاں چین سمیت دیگر پرولتاری بونا پارٹسٹ ریاستوں میں بھی وقوع پذیر ہوا۔ اس سے یہ نتیجہ اخذ کیا جا سکتا ہے کہ قومیائی گئی منصوبہ بند معیشت بھی اگر قومی حدود میں مقید رہ جائے تو مادی ترقی کا وہ معیار حاصل نہیں کر سکتی جو حاکمیت کی تمام شکلوں کا خاتمہ کرنے کے لیے ضروری ہے۔ بلکہ قومی حدود میں مقید رہ کر اس کا مزید ارتقا لازمی ایسے حالات کو جنم دیتا ہے جس میں ماضی کے حکمران طبقات کی تمام غلاظتیں دوبارہ ظاہر ہونا شروع ہو جاتی ہیں۔ انسانی سماج کے کئی صدیوں پر محیط ارتقا کا سبق یہی ہے کہ اقلیت کی حاکمیت اور کنٹرول سے بد عنوانی کو الگ نہیں کیا جا سکتا چاہے اس حاکمیت کی بنیاد کسی بھی قسم کے پیداواری رشتوں پر کیوں نہ ہو۔ اس بنیاد پر جائزہ لیا جائے تو ایک طبقاتی نظام کے ڈھانچے کو قائم رکھتے ہوئے اس کو بد عنوانی سے پاک کرنے کی بات درحقیقت اس نظام کے خلاف اُبھرنے والی نفرت کو گمراہ کرنا اور دوبارہ اسی نظام پر عام لوگوں کے اعتماد کو بحال کرنے کا مقصد پورا کرتی ہے۔ اسی لیے بدعنوانی کے خاتمے کی اکثر تحریکوں کو حکمران طبقات اور ان کے ذرائع ابلاغ کی پوری پشت پناہی حاصل ہوتی ہے چونکہ یہ تحریکیں نظام کے لیے خطرہ بننے والے عوامی غم و غصے کو انقلابی راستے سے بھٹکا دیتی ہیں۔ حکمران طبقات اور ذرائع ابلاغ کی بڑے پیمانے پر حمایت نہ صرف ہندوستان میں عام آدمی پارٹی بلکہ 2011ء کے بعد سے پاکستان میں تحریک انصاف کی سابقہ بد عنوان حکمرانوں کے خلاف چلائی جانے والی مہم کو بھی دستیاب رہی۔

عام آدمی پارٹی کی حکومت اور محنت کش طبقہ

اس سال جنوری سے دہلی کی آنگن وادی سکیم کی ہزاروں محنت کش خواتین اجرتوں میں اضافے اور دیگر مطالبات کے حق میں ہڑتال پر ہیں لیکن عام آدمی پارٹی نے مطالبات تسلیم کرنے کی بجائے ان کے خلاف بھی لازمی سروسز ایکٹ کا کالا قانون نافذ کرنے کا اعلان کر دیا۔ آنگن وادی خواتین کی یہ ہڑتال کئی مہینوں سے جاری ہے اور دہلی حکومت نے تقریباً 900 خواتین کو برطرف کر دیا ہے۔ حکومت کے اس انتہائی وحشیانہ اقدام کے خلاف دہلی ہائی کورٹ کو مداخلت کر کے حکومت کو مزید بر طرفیوں سے روکنے کا حکم جاری کرنا پڑا ہے۔

عام آدمی پارٹی کی حکومت بھی ہندوستان کی دیگر ریاستوں اور مرکزی حکومت کی طرح ہی ایک نااہل سرمایہ دارانہ حکومت ہے۔ اس کا ثبوت کرونا لاک ڈاؤن کے وقت سامنے آیا جب دہلی افرا تفری، بھوک، اموات، ہجرتوں اور انتشار کا سب سے بڑا مرکز بنا ہوا تھا۔ کنٹریکٹ پر نوکریاں کرنے والے لاکھوں محنت کشوں کو راتوں رات بیروزگار اور بے گھر ہوکر واپس اپنے دیہاتوں کی جانب ہجرت پر مجبور ہونا پڑا اور ٹرانسپورٹ بند ہونے کی وجہ سے ان کے لیے دیہاتوں میں واپسی کا سفر بھی ناممکن ہو کر رہ گیا تھا۔ دہلی حکومت نے تمام مزدوروں کو دو ماہ کی تنخواہ دینے کا اعلان کیا جسے سرمایہ داروں نے تسلیم کرنے سے انکار کر دیا مگر دہلی حکومت ان سرمایہ داروں کا کچھ نہیں بگاڑ سکی۔ عام آدمی پارٹی کا ایک اہم اعلان تمام کنٹریکٹ ملازمین کو مستقل کرنے کا وعدہ تھا مگر سات سال کی حکومت کے بعد بھی اس اعلان پر عملدرآمد نہیں کیا جا سکا۔ نجی شعبے سمیت سرکاری اداروں میں کام کرنے والے لاکھوں محنت کش اس وعدے کی تکمیل کے منتظر ہیں۔ دہلی ٹرانسپورٹ کارپوریشن کے محنت کشوں نے ملازمین کی مستقلی کے لیے بارہا ہڑتالیں اور احتجاج بھی کیے لیکن عام آدمی پارٹی کی حکومت نے ان کے مطالبات کو تسلیم نہیں کیا بلکہ کنٹریکٹ ملازمین کی تنخواہوں میں کمی کا فیصلہ کیا۔ اکتوبر 2018ء میں ٹرانسپورٹ ورکرز نے کنٹریکٹ ملازمین کی تنخواہوں میں کمی کے فیصلے کے خلاف 29 اکتوبر کو ہڑتال کی کال دی۔ عام آدمی پارٹی کی حکومت نے ان کے مطالبات تسلیم کرنے کی بجائے ان پر لازمی سروسز ایکٹ کے نفاذ کا اعلان کیا لیکن اس کے باوجود ٹرانسپورٹ ورکرز نے، چکہ بند، کے نعرے کے تحت دہلی میں پہیہ جام کر دیا۔ کئی ہفتوں تک جاری رہنے والی اس ہڑتال نے آخرکار عام آدمی پارٹی کو تنخواہوں میں کمی کے مزدور دشمن فیصلے کو واپس لینے پر مجبور کر دیا۔ اسی طرح کنٹریکٹ ملازمین کو مستقل ملازمین کے برابر اجرتیں دینے کا قانون منظور کیے جانے کے باوجود ابھی تک اس پر عملدرآمد نہیں کیا جا سکا۔ صحت عامہ کی آشا جیسی سکیموں کے ساتھ دیگر شعبوں میں اسی قسم کی سکیموں کے تحت کام کرنے والے ہزاروں محنت کش اپنے بنیادی حقوق سے محروم ہیں۔ آشا سکیم کے ملازمین تین ہزار روپے ماہانہ اور ایک ہزار روپے کرونا الاؤنس جیسی انتہائی کم اجرتوں پر کام کر رہے ہیں۔ اسی طرح دہلی کی فیکٹریوں کے مزدور انتہائی غیر انسانی حالات میں معمولی اجرتوں پر کام کرنے پر مجبور ہیں جہاں آئے روز فیکٹری حادثوں میں درجنوں مزدور اپنی جان سے ہاتھ دھو بیٹھتے ہیں لیکن عام آدمی پارٹی کی حکومت ان سرمایہ داروں کی مکمل گماشتگی میں چپ سادھے بیٹھی ہے۔ 2019ء میں دہلی کے علاقے اناج منڈی میں ایک فیکٹری میں آگ لگنے سے 50 مزدور ہلاک ہو گئے جبکہ سینکڑوں زخمی ہوئے۔ حادثے کے بعد ہونے والی تحقیقات سے ظاہر ہوا کہ چمڑے کے بیگ بنانے والی اس فیکٹری کے مزدوروں کو فیکٹری کے گودام میں ہی رہنے پر مجبور کیا گیا تھا۔ عام آدمی پارٹی کی حکومت میں دہلی کی تمام تر نجی فیکٹریوں میں مزدوروں کو ہر قسم کے بنیادی قانونی حقوق سے محروم رکھا جاتا ہے اور فیکٹری مالکان سیفٹی اور کم از کم اجرت جیسے تمام قوانین کو اپنے جوتے کی نوک پر رکھتے ہیں مگر پھر بھی عام آدمی کی نمائندگی کا دعویٰ کرنے والی اس پارٹی کی حکومت ایسے واقعات کے خلاف کوئی اقدام تو دور کی بات ان کی کھل کر مذمت تک کرنے کی جرات نہیں کر تی۔ اس سال جنوری سے دہلی کی آنگن وادی سکیم کی ہزاروں محنت کش خواتین اجرتوں میں اضافے اور دیگر مطالبات کے حق میں ہڑتال پر ہیں لیکن عام آدمی پارٹی نے مطالبات تسلیم کرنے کی بجائے ان کے خلاف بھی لازمی سروسز ایکٹ کا کالا قانون نافذ کرنے کا اعلان کر دیا۔ آنگن وادی خواتین کی یہ ہڑتال کئی مہینوں سے جاری ہے اور دہلی حکومت نے تقریباً 900 خواتین کو برطرف کر دیا ہے۔ حکومت کے اس انتہائی وحشیانہ اقدام کے خلاف دہلی ہائی کورٹ کو مداخلت کر کے حکومت کو مزید بر طرفیوں سے روکنے کا حکم جاری کرنا پڑا ہے۔ حکومت کے ان انتہائی اقدامات کے باوجود محنت کش خواتین کی یہ جدوجہد جاری ہے اور عام آدمی پارٹی کا مزدور دشمن مکروہ چہر ننگا کرنے میں اہم کردار ادا کر رہی ہے۔

عام آدمی پارٹی کے بڑے کارنامے!

عام آدمی پارٹی نے جو اعلانات کیے تھے ان میں سے محض چند ایک پر ہی جزوی عملدرآمد کیا جا سکا ہے۔ 11 فروری 2020ء کو ٹائمز آف انڈیا نے ایک مضمون میں عام آدمی پارٹی کے سات کارناموں کی تفصیلات لکھیں جن کے باعث اسے تیسری بار دہلی میں انتخابی فتح حاصل ہوئی۔ ان کارناموں میں پہلا دہلی کے پرائیویٹ سکولوں کی فیسوں میں بے تحاشا اضافے پر کنٹرول تھا۔ دوسرا دہلی میں ایک ہزار محلہ کلینک کے ذریعے صحت کی سہولیات تک سب کی رسائی کو ممکن بنانے کا اعلان کیا گیا تھا لیکن اب تک محض 300 محلہ کلینک بنائے جا سکے۔ اسی طرح سرکاری سکولوں میں نئے کمروں کی تعمیر اور دیگر کچھ ایسی سرگرمیاں متعارف کرائیں جو نجی تعلیمی اداروں میں ہوتی تھیں۔ سب سے بڑا ریلیف جو دیا گیا وہ دو سو یونٹ ماہانہ تک استعمال کرنے والوں کو مفت اور چار سو یونٹ ماہانہ استعمال کرنے والوں کو 50 فیصد قیمت پر بجلی اور بیس ہزار لیٹر مفت پانی کی فراہمی ہے، لیکن دہلی کی کچی بستیوں، جھونپڑ پٹیوں سمیت غریبوں کے ایسے بے شمار علاقے ہیں جو ابھی تک اس آسائش سے بھی محروم ہیں۔ اس کے ساتھ بی جے پی کی مذہبی انتہا پسندی کے مقابلے میں ایک اعتدال پسند ہندتوا کے پرچار کے ساتھ مذہبی مقامات کی یاترا پر جانے والے بزرگوں کے لیے مفت ٹرانسپورٹ کی سہولت مہیا کی گئی۔

نتائج

مارکسزم سماج کے سائنسی تجزیے و تناظر کا فلسفیانہ طریقہ کار ہے جس میں کسی بھی سیاسی و سماجی مظہر کے عروج و زوال کو پورے بورژوا سماج کے ساتھ تعلق میں دیکھا جاتا ہے۔ جبکہ پیٹی بورژواخیال پرستوں کی کھوکھلی دانش کسی بھی سیاسی پارٹی کا تجزیہ اس کی محض ظاہری کامیابی سے مرغوبیت کی بنیاد پر کرتی ہے۔ عہد حاضر کے بے شمار نام نہاد بائیں بازو کے گروپوں کا تعلق بھی دانشوروں کی اسی نوع سے ہے جو دائیں بازو کے نئے اور سابقہ کے مقابلے میں زیادہ رجعتی مظہر کے اُبھار پر فاشزم، فاشزم چلانے لگتے ہیں اور اسی طرح کسی دائیں بازو کے نیم اصلاح پسند نعرے باز کو بھی سوشلسٹ بنا کر پیش کرنے سے باز نہیں آتے۔ اس تمام شور و شرابے میں وہ محض ایک چیز کوپوری صفائی کے ساتھ ظاہر کرتے ہیں اور وہ ہے ان کی سطحیت، ان کا کھوکھلا پن اور مارکسی فلسفے سے مکمل لا علمی۔ نام نہاد بائیں بازو کے جو لوگ عام آدمی پارٹی کو بائیں بازو کا رحجان تو دور کی بات کوئی اصلاح پسند پارٹی بھی سمجھتے ہیں ان کی عقل پر ماتم کرنا بھی وقت کا ضیاع ہے۔ عام آدمی پارٹی کا منشور اور نعرے بازی تجربیت اور عملیت پسندی کی بنیاد پر بورژوا سماج کے سلگتے ہوئے مسائل کو ریاست کی انتظامی مشینری کی کارکردگی کو بہتر بنا کر حل کرنے کے پروگرام سے زیادہ کچھ نہیں۔ عام آدمی کی اصطلاح ایک انتہائی عمومی، مبہم اور غیر واضح اصطلاح ہے جس کے ذریعے بورژوا سماج کی طبقاتی ساخت اور مختلف طبقات کے کردار کی وضاحت نہیں ہوتی۔ پارٹی کے پروگرام میں عام آدمی کی اصطلاح کا مفہوم و معنی بھی رائج الوقت سیاسی پارٹیوں اور قائدین کے خلاف استعمال کرتے ہوئے حاوی سیاسی اشرافیہ کے مقابلے میں خود کو سیاسی اختیارات اور حکومتی ایوانوں تک رسائی سے محروم لوگوں کا نمائندہ ثابت کرنے کے لیے ہے۔ دوسری جانب عام آدمی کی اصطلاح واضح طور پر بورژوا سماج کی پیدا کردہ طبقاتی تقسیم میں پرولتاری طبقے کے تاریخی کردار کو چھپانے اور اسے مسخ کرنے کے لیے ایک زہریلے اوزار کے طور پر استعمال کی جارہی ہے۔ یہ سیاسی سوچ پھیلائی جارہی ہے کہ واضح طبقاتی سیاست اور انقلاب کی جدوجہد ضروری نہیں بلکہ سرمایہ دارانہ ریاست کے بدعنوانی جیسے دیگر مسائل کے خلاف سبھی لوگ مل کر کوشش کریں تو ان برائیوں کا خاتمہ کرتے ہوئے ایک اچھی اور عام آدمی کی دوست سرمایہ داری تعمیر کی جاسکتی ہے۔ اس پروگرام کا بنیادی اور لازمی پیغام یہ ہے کہ سرمایہ داروں کی حاکمیت، تسلط، لوٹ مار اور استحصال کے خاتمے کے بارے میں سوچنا بھی جرم ہے۔ خرابی سرمائے کی حاکمیت اور استحصال کی وجہ سے نہیں۔ لہٰذا اس حاکمیت کو قائم رکھنے والی ریاستی و انتظامی مشینری کی بدعنوانی اور رشوت خوری جیسے مسائل کو دور کر دیا جائے تو سب اچھا ہو جائے گا۔ پھر ان مسائل کو بھی دور کرنے کا صرف ایک طریقہ ہے کہ حاوی سیاسی پارٹیوں کی جگہ اروند کجریوال اور اس کے ڈھونگی گروہ کو اقتدار میں لا یا جائے۔ عام آدمی پارٹی کی دہلی اور پھر حالیہ عرصے میں پنجاب کے انتخابات میں فتح کا جائزہ لیا جائے تواس میں بھی یکسر کوئی ایسا حیرانگی کا پہلو نہیں ہے۔ سرمایہ داری نظام کے عالمی بحران کے باعث گزشتہ دہائی کے دوران مختلف ممالک میں سیاست پر حاوی دائیں اور بائیں بازو کی پارٹیوں کے زوال اور نئی پارٹیوں کے اُبھار کا ایک پورا سلسلہ نظر آتا ہے۔ مزدور تحریک میں حقیقی مارکسی قوتوں کی کمزوری، سٹالنسٹ اور اصلاح پسند پارٹیوں کی غداری اور سرمایہ داری کے بدترین بحران کے امتزاج نے ایک ایسی صورتحال پیدا کر دی ہے جس میں محنت کشوں اور درمیانے طبقے کی بحران سے نجات پانے کی خواہش انتخابی میدان میں ہر ایسے بائیں یا دائیں بازو کے رحجان، جو بھی سٹیٹس کو کے خاتمے کی بات زیادہ جرات کے ساتھ کرتا ہے، کی حمایت میں اپنا اظہار کرتی ہے۔ عالمی سطح پر ایسے حالات موجود ہیں جن میں حقیقی مارکسی قوتوں کی عدم موجودگی یا عددی کمزوری کے باعث دائیں اور بائیں بازو کے پاپولسٹ رحجانات کے تیزی سے اُبھرنے اور ڈوبنے کا عمل جاری رہے گا۔ عام آدمی پارٹی کی فتح بھی ہندوستان کی سیاست پر حاوی پارٹیوں بالخصوص کانگریس سے شدید نفرت کا اظہار ہے۔ عام آدمی پارٹی کی روزمرہ مسائل کے حل کی بات کے ساتھ اس کو دیگر پارٹیوں پر سب سے بڑی فوقیت یہ حاصل ہے کہ اس پر ماضی کا کوئی بوجھ نہیں اور اس کا نیا ہونا از خود ایک مراعت ہے۔ بورژوا پارلیمانیت سے عام لوگوں کی نفرت اور بد اعتمادی کے اظہار کا یہ ابتدائی قدم ہے کہ وہ سات عشروں سے سیاست پر حاوی پارٹیوں کو مسترد کرکے کسی نئی پارٹی کو ووٹ دے رہے ہیں۔ قومی سطح پر کانگریس اور اس کی اتحادی پارٹیوں کے خلاف بی جے پی کی 2014ء کے انتخابات میں فتح کی بنیادی وجہ بھی ایک جانب ان پارٹیوں سے شدید نفرت اور دوسری جانب مودی کی انتخابی مہم میں منافقانہ طبقاتی نعرے بازی تھی جس میں اس نے خود کو چائے والا اور راہول گاندھی کو شہزادہ قراردے کر انتخابات کو غریب اور امیر کے درمیان لڑائی کے طور پر پیش کیا تھا۔ بی جے پی کی 2019ء کے انتخابات میں دوبارہ فتح اصل میں کانگریس اور کمیونسٹ پارٹیوں کی جانب سے کوئی بھی متبادل پروگرام دینے میں مکمل ناکامی کا نتیجہ تھا۔ درحقیقت سرمایہ داری نظام کے زوال اور بحران کی شدت اور تسلسل کے باعث ہر ملک میں سماجی تبدیلی کی شدید خواہش اور تڑپ موجود ہے جس کا ابتدائی اظہار اس قسم کے متضاد مظاہر کے اُبھار میں ہو رہا ہے۔ ان تمام مظاہر میں ایک عنصر مشترک ہے کہ ہر دائیں یا بائیں بازو کے پاپولسٹ رحجان کو سٹیٹس کو کو تبدیل کرنے کا نعرہ دینا پڑتا ہے۔ اس سطح پر طبقاتی شعور سے عاری عوام کی اکثریت درمیانے طبقے کی پیروی کرتے ہوئے تبدیلی کے نعرے کو سنجیدہ لے رہی ہے اور انہیں اس سے غرض نہیں کہ یہ تبدیلی بائیں بازو کے انقلابی اقدامات کے ذریعے لائی جائے گی یا دائیں بازو کے رجعتی اقدامات کے ذریعے۔ پیٹی بورژوا خیال پرستوں کا سب سے بڑا المیہ یہ ہے کہ ان کے خیال میں سرمایہ داری کی اصلاح کرتے ہوئے اسے بحرانوں سے نکالا جا سکتا ہے۔ اسی بنیاد پر ان کے لیے سماج کی انقلابی تبدیلی ایک یوٹوپیا جبکہ عملی سیاست یعنی اس نظام کا حصہ بن کر اس کی برائیوں کو دور کرنا ہی اصل انقلابی کام ہوتا ہے۔ ہندوستان میں عام آدمی پارٹی کی بدعنوانی کے خلاف تحریک ہو یا پاکستان میں عمران خان کا اُبھار، دونوں ہی درمیانے طبقے کی اسی سوچ کی پیداوار ہیں جنہیں حکمران طبقے کے ایک حصے کی حمایت اور ذرائع ابلاغ کی بڑے پیمانے پر تشہیر کے ذریعے عام لوگوں کے شعور پر مسلط کیا جاتا ہے۔ یہ دونوں ایک ہی قسم کے دائیں بازو کے پاپولسٹ مظاہر ہیں جن میں بے شمار امتیازات کے باوجود چند کلیدی مماثلتیں پائی جاتی ہیں۔ دونوں بدعنوانی کے خلاف تحریکوں اور نعرے بازی کے ذریعے درمیانے طبقے کی حمایت پر پروان چڑھائے گئے۔ دونوں نے آزادی کے قائدین سے نعرے مستعار لیے اور سات دہائیوں سے سیاست پر حاوی پارٹیوں کے خلاف خود کو نئے اور اصلاحات کے ذریعے تبدیلی لانے والے کے طور پر پیش کیا۔ بحرانوں کے ادوار میں بورژوا حاکمیت کو قائم رکھنے کے لیے ہمیشہ ایسے نئے چہروں اور پارٹیوں کی ضرورت موجود رہتی ہے جو تبدیلی کی منافقانہ نعرے بازی کے ذریعے محنت کشوں اور عوام میں مقبولیت حاصل کر سکیں۔ اسی لیے ہمیں ہندوستان کے کچھ لبرل دانشور اور تجزیہ نگار بورژوازی کو کانگریس کے تاریخی زوال سے پیدا ہونے والے خلا میں عام آدمی پارٹی کو مستقبل کی ایک قومی پارٹی کے طور پر دیکھنے اور اس کے بارے میں سنجیدہ منصوبہ بندی کرنے کا مشورہ دیتے نظر آتے ہیں۔ ہندوستان کی بورژوا سیاست میں کانگریس کا زوال حقیقت میں ایک سنجیدہ بحران کو شدید تر کرتا جا رہا ہے۔ بی جے پی کی دو تہائی اکثریت سے لگاتار دوسری بار حکومت کے قیام اور کئی ایک ریاستوں میں انتخابی فتح کے ذریعے اس کی ظاہری طاقت کا جو تاثر اُبھر رہا ہے وہ اس کی حقیقی طاقت اور عوامی بنیادوں کی درست عکاسی نہیں کرتا۔ یہ درست ہے کہ کانگریس اور بائیں بازو کی سٹالنسٹ پارٹیاں بی جے پی کے مقابلے میں خود کو اس سے بہتر متبادل کے طور پر پیش کرنے میں بری طرح ناکام ہوئی ہیں جس کے باعث بی جے پی کا اُبھار اس کی اصل طاقت سے کئی گنا بڑا دکھائی دیتا ہے۔ حالیہ عرصے میں کانگریس کے ڈوبتے سورج کی ترچھی شعاعوں کا پیدا کردہ بی جے پی کا اس کے اصل قد سے کئی گنا بڑا سایہ ہندوستان کے سیاسی اُفق پر چھا کر ہر منظر کو دھندلا رہا ہے۔ مگر اصل صورتحال اس سے یکسر مختلف ہے۔ ہندوستان کے محنت کشوں کی گزشتہ کئی سالوں سے لگاتار ہر سال ہونے والی عام ہڑتالیں، بی جے پی حکومت کے کسان دشمن قوانین کے خلاف ایک سال تک جاری رہنے والی کسانوں کے بے مثال جدوجہد کی زبردست فتح، شہریت کے قوانین کے خلاف اُبھرنے والی عوامی تحریک اور اس وقت جاری دہلی کی آنگن وادی محنت کش خواتین کی انتہائی لڑاکا تحریک جیسی محنت کشوں کی بے شمار چھوٹی بڑی لڑائیاں ایک بالکل مختلف منظر کی تخلیق میں محو ہیں۔ بی جے پی اپنی تمام تر انتخابی کامیابیوں کے باوجود سرمایہ داری کے بڑھتے ہوئے بحران کے باعث متشدد ہندو انتہا پسندی کی جانب تیزی سے لڑھکتی جا رہی ہے جس سے اس کے بڑھتے ہوئے داخلی بحران اور تضادات کی عکاسی ہوتی ہے۔ اپنی کامیابی کے عروج پر بی جے پی میں داخلی طور پر یہ تضاد شدت اختیار کرتا جا رہا ہے کہ بی جے پی اپنی تشکیل کے ایک اہم عنصر، رجعتی ہندتوا یا آر ایس ایس، کے نظریات پر عمل پیرا ہو کر تمام مذہبی اقلیتوں سے ہندوستان کو پاک کرے گی یا پھر وہ ہندوستان کے نام نہاد سیکولر بورژوا طبقے کی ایک گماشتہ پارٹی رہے گی۔ مذہبی انتہا پسندی کے نظریات کو حصول اقتدار کی کوششوں کے دوران ایک اوزار کے طور پر استعمال کرنا الگ بات ہے لیکن بر سر اقتدار آنے کے بعد ان جنونی نظریات کے حامل حصوں کو قابو میں رکھ پانا بالکل مختلف بات ہوتی ہے۔ آر ایس ایس کے جنونی حصوں کی اپنے ہندتوا ایجنڈے پرعمل کی کوششیں بورژوا نظام سے متصادم ہورہی ہیں۔ بورژوازی کے لیے ہندتوا جنونیوں کی متشدد سرگرمیاں ایک محدود دائرے کے اندر ہی قابل قبول ہیں لیکن بی جے پی کی اس قدر بھاری انتخابی فتح ان بورژوا حدود و قیود کو توڑنے کا تقاضا کر رہی ہے۔ یہ تضاد آنے والے ماہ و سال میں شدت اختیار کرے گا اورایک خاص وقت میں اس کی وجہ سے بی جے پی کے اندر ٹوٹ پھوٹ اور بحرانات کا ایک پورا سلسلہ جنم لے گا۔ ہندوستان کی بورژوا سیاست اور پارٹیوں کا بحران آنے والے عرصے میں مزید شدت اختیار کرے گا اور ایسے وقت میں عام آدمی پارٹی کے مرکزی سطح پر بر سر اقتدار آنے کے امکان کو بھی رد نہیں کیا جا سکتا۔ لیکن اس کے ساتھ دوسری جانب ہندوستان کا محنت کش طبقہ بھی تیزی سے اس نظام کے خلاف جدوجہد کے میدان میں اتر کر اس سارے منظر کو تبدیل کر کے رکھ دے گا۔ مارکسزم یہ واضح کرتا ہے کہ بورژوا سماج کے خلاف جدوجہد میں پرولتاری طبقہ سماج کی سبھی استحصال زدہ پرتوں اور درمیانے طبقے کی قیادت حاصل کرتے ہوئے بورژوا ریاست کو اُکھاڑ کر ایک پرولتاری ریاست قائم کرے گا۔ بورژوا سماج میں پرولتاریہ واحد ایسا طبقہ ہے جو اپنی نجات کے لیے جو بھی انقلابی اقدامات کرے گا ان کے ذریعے سماج کی دیگر تمام استحصال زدہ پرتوں کی نجات کا حصول بھی ممکن ہو پاتا ہے۔ اسی لیے بورژوا سماج کے خلاف لڑائی کے لیے ایک واضح طبقاتی اور سوشلسٹ انقلاب کے پروگرام کا ہونا بنیادی شرط ہے۔